CALBAYOG CITY, Samar -- Opisyal sa barangay ug usa ka hitman ang napatay atol sa ilang pinusilay sa P1, Barangay Dagum, Calbayog City, pasado alas 5 sa hapon, Huwebes, Septiyembre 12, 2019.

Giila ang biktima nga si barangay kagawad Simeon Tarrayo, 51, taga Barangay Carmen, Calbayog City, Samar.

Sa paghimo ning balita wa pa mailhi sa kapulisan ang hitman nga nakapinusilay sa bikitma.

Base sa imbestigasyon sa kapulisan, nagsakay og motorsiklo si Tarrayo ug pag-abot sa lugar nga nahitaboan, niabot ang upat ka gunmen sakay sa duha ka motorisklo.

Gisugdan pagpamusil sa mga gunmen si Tarrayo apan nakahimo pa kini sa pagbawos gamit ang iyang gidala nga armas.

Naigo sa nagkadaiyang parte sa lawas si Tarrayo samtang naigo usab ang usa sa mga gunmen ug namatay nga nagbuy-od sa karsada human naigo og kaduha sa dughan.

Gidala pa og suway sa tambalanan si Tarrayo apan gideklarar kini nga dead on arrival sa doktor.

Padayon pa nga gisusi sa kapulisan ang posibleng motibo sa krimen ug kinsa ang responsable niini samtang giila pa usab ang namatay nga hitman.

Pipila ka opisyal sa barangay sa Calbayog ang gipamatay sud ning tuiga. (Superbalita Cebu)