BARANGAY patrol vehicle nga gisakyan sa pipila ka mga tawo nga nangompra nalimbuwad alas 5:15 sa buntag sa Lunes sa Osmeña Boulevard, Brgy. Sto. Niño, dakbayan sa Sugbo.

Nakalingkawas sa tinong kamatayon si Napoleon Tolero, 55, minyo, taga Brgy. Carreta, dakbayan sa Sugbo, kinsa nagmaniho sa 03L nga traditional PUJ.

Si Tolero nga nahinabi sa dySS Super Radyo Cebu nagkanayon nga gikan siya sa dalan Manalili, maoy paggawas alang sa pagpamasahero.

Samtang siya nagsubay sa maong dalan paingon sa Carbon Public Market, kalit siyang gidaro sa naghaguros nga patrol vehicle sa Barangay Kamagayan nga gimaneho ni Amancio Wenceslao, 68.

Si Wenceslao nibutyag nga gikan sab sila sa Carbon Public Market nangumpra ug padulong sa Barangay Canduman, Dakbayan sa Mandaue.

Sakay ni Wenceslao ang duha ka senior citizens ug usa ka batan-on nga kanhi nagpuyo sa Kamagayan, apan gibalhin sa relocation site sa Canduman.

Ang mao nga mga lumolupyo mga botante gihapon sa Kamagayan.Si Wenceslao, nangangkon nga kalit siyang gidasmagan sa PUJ bisan go signal apan si Tolero nisulti nga siyay gibanggaan sa naghaguros nga ambulansya.

Makita sa CCTV camera sa Barangay Santo Niño nga ang ambulansiya maoy nilahos bisan kon naka red signal ang traffic light.

Si Patrolman Ju-Csar Borras, imbestigador sa Waterfront Police Station, nagkanayon nga sad-an si Wenceslao.

Gibutyag ni Borras nga makita sa CCTV cam nga beating the red light ang ambulansiya sa Kamagayan.

Dugang niya nga dunay amicable settlement sa matag habig.Motabang ang Brgy. Kamagayan sa pagbayad sa danyos sa PUJ.

Si Wenceslao mibutyag nga duna siyay duha ka senior citizens nga pasahero nga babaye ingon man usa ka batan-on.

Giklaro niya nga dili mga pasyente iyang sakay kay kauban niini nga nangumpra gikan sa Carbon Public Market padulong sa Canduman.

Si Percival Perez, kawani sa Barangay Kamagayan, nipasabot sa Superbalita Cebu nga ilang giabagan ang duha ka mga senior citizen nga makapangompra sa Carbon.

Kini naatol usab nga magkuha ang patrol vehicle sa usa ka kawani sa barangay nga sa Canduman na nagpuyo.(GPL)