DUL-AN sa katunga sa 80 ka mga barangay niduso og team para maoy molangkob sa barangay contact tracing ug extraction team para motabang sa contact tracing team nga giumol sa Emergency Operation Center (EOC) sa Dakbayan sa Sugbo para ma-isolate ang mga tawo nga adunay coronavirus disease (Covid-19).

Base sa data gikan sa Department of the Interior and Local Government (DILG) sa Cebu City, 27 ka mga barangay ang nakahatag na og team para sa contact tracers ug 36 ka barangay ang niduso sa ilang extraction team.

Si Atty. Ian Kenneth Lucero, pangulo sa City DILG, nagkanayon nga ang mao nga mga tawo ipaubos sa pagbansaybansay sa eksperto gikan sa Cebu City Police Office (CCPO) ug Armed Forces of the Philippines (AFP).

“They shall be assigned in assisting our contact tracing teams of EOC in locating the list of positive patients and the extraction of individuals found positive for Covid 19 which needs to be transported to their designated isolation centers,” padayag ni Lucero.

Sila ang motabang sa 134 ka contact tracing teams nga gilangkuban sa Philippine National Police, Bureau of Fire Protection, Armed Forces of the Philippines, doctors, nurses, medical technologists para sa subsob nga contact tracing nga gisugdan na sa dakbayan kapin sa duha ka mga semana na ang nakalabay. (PAC)