Gipasabot sa opisyal sa Metro Cebu Water District (MCWD) nga bisan kon diyutay ra ang ilang konsumo sa tubig, minimum gihapon ang ilang bayran.

Kini ang gipahibawo ni Edna Inocando, spokesperson sa MCWD, human adunay mga konsumidor nga nipadangat sa ilang mga reklamo kay way agas o kon duna man, gamay ra sab kaayo.

Bisan pa ning mao nga mga kasinatian, nagbayad gihapon sila og P152 matag buwan.

“Ang MCWD mo-bill gyud, ma-zero to 10 cubic meters consumption, mao man na ang atong minimum. Nigamit sila sa tubig o wala , mo-bill gyud ta as long as naa silay active water meter o connection,” matod ni Inocando.

Si Acting Assistant General Manager Edgar Ortega nagkanayon nga adunay 200,000 ka mga water connection ilawom sa pagdumala sa MCWD. Ang 5 porsyento kanila mao ang nagbayad og minimum matag buwan ngadto sa water district. / PAC