HUMAN mabisita sa Environmental Management Bureau (EMB)-7 ang taho kabahin sa giingong medical waste sa Barangay Bagacay, lungsod sa Sibonga, nakompirmar kini nga household solid waste ra ug dili medical waste.

Ang EMB-7 nagpadala dayon og personnel niadtong Miyerkules, Enero 16, human makadawat og taho gikan mismo sa local government unit (LGU) sa Sibonga.

Inubanan sa EMB-7 ug ni Municipal Environment and Natural Resources Officer(MENRO) sa Sibonga nga si Miguelito Paller, gisusi ang basura nga gihipos sa barangay hall sa Bagacay.

Lakip sa nakit-an sa mga residente niadtong Miyerkules ang usa ka hiringgilya, usa ka plastic nga botelya nga murag hiringgilya, liniment bottle, pharmaceutical bottle, ug amber bottle.

Matod sa EMB-7 nga kining mga medicinal items nga gigamit sa panimalay, dili matawag nga medical wastes.

Ubos sa Department of Environment and Natural Resources (DENR) Administrative Order (AO) 2013-22, ang healthcare wastes mao kini ang mga basura nga gikan sa tambalanan, medical center, ug clinic.

Lakip nga nasuta sa maong basura nga gisulod og plastic kining medicine blister packs, botelya sa pahumot, marker pens, ug eye mascara container.

Naa usab kini tarpaulin, tuwalya, ug ubang mga plastic.

Tambag sa EMB-7 sa barangay officials sa Bagacay, nga ibutang ang nakuha nga basura sa ilahang Materials Recovery Facility (MRF).

“We have always been reminding the public about this to always throw garbage properly. We also ask you all to take this matter seriously,” matod ni EMB-7 regional director Engineer William Cuñado.