PATAY nang napalgan sa mga sakop sa rescue team ang usa ka 12 anyos nga lalake nga nalumos samtang nanagat sa kadagatan duol sa Aduana sa Pier Area sa dakbayan sa Sugbo kagahapon sa hapon, Nobiyembre 4.

Ang biktima nailhan nga si Raven Fajardo, 12, lumolopyo sa Barangay Hipodromo, Siyudad sa Sugbo.

Ang mga sakop sa Philippine Coast Guard, Special Rescue Force (SRF) sa Bureau of Fire Protection ug mga sakop sa City Disaster Risk Reduction Management Personnel sa dakbayan sa Sugbo dali miresponde human madawat ang tawag kalabot na sa usa ka 12 anyos nga batang lalake nga giingong nahulog sa pump boat nga gisakyan samtang kini nanagat.

Si F/insp. Azraf Grar sa Cebu City Fire Office usa sa mga nitabang sa pagluwas sa bata nga nalumos maoy mihatag ug direktiba sa iyang mga sakop uban sa miresponde ang mga sakop sa Philippine Coast Guard kinsa ang ilang mga motor banka maoy gigamit sa pag pangita sa maong bata.

Matud sa duha ka mga giubanan ni Fajardo nga sila si Romelito Abiso ug Roel Binalayo nga dili unta kini pakuyogon sa ilaha apan namugos gyud. Pulong pa ni Fajardo nga nananghid na kini sa iyang inahan.

Sa ilang pagpanginhas. ang grupo ni Abiso ug Binalayo didto pa nanukad sa Shell Island atbang sa Aduana Port.

Ang ilang katapusang nakit-an si Fajardo mikuyog sa duha ka mga babaye nga kauban nila hangtud nga nahibaloan na lang nila nga nawala na si Fajardo. Ala una sa hapon nahitabo ang insidente rason nga nag dali-dali sila ug panguli aron mopahibalo sa hitabo.