BAYOT nga nangangkong natakdan og sexually transmitted disease ug giingong nangilkil dala ang panghulga sa iyang uyab nga langyaw nadakpan sa entrapment operation niadtong Sabado, Enero 25, 2020.

Tungod niini, pasakaan siya og duha ka mga kaso sa Regional Anti-Cybercrime Unit (Racu) 7 nga maoy gidangpan sa langyaw.

Si Jay (di tinuod niyang ngan), 27, hair dresser sa usa ka parlor sa Dakbayan sa Talisay, nanghimakak nga nangilkil siya kang Devon (di tinuod niyang ngan), 42, British national, nanag-iya og resort sa amihanang Sugbo.

Si Police Staff Sgt. Jonelle Jay Ocariza, imbestigador sa Racu 7 nga nahinabi sa Superbalita Cebu, niingon nga si Devon nangayo nila og abag niadtong Sabado kay nabalaka siya nga mauwawan kay gihulga siya ni Jay nga ipakatap ang ilang sex video ug hulagway sa social media.

Matod ni Devon ngadto sa kapulisan nga gipangayoan siya og kwarta bugti sa di pag-post niini.

Tungod niini, nipahigayon silag entrapment operation nga niresulta sa pagkasikop sa bayot.

Si Jay, kinsa nahinabi sa Superbalita Cebu, niangkon nga nangayo siya og P5,000 aron gamiton pagpalit og tambal sa iyang pagkasira.

Wa gilayon mohatag si Devon hinungdan nga ang ilang mga hulagway nga nagpakita sa ilang kombate sa kama iyang gipadala ngadto sa landlord sa apartment nga giabangan sa langyaw

Suma pa niya nga naglalis sila sa langyaw gumikan sa iyang kalagot nga nasira human sa ilang sex niadtong Disyembre 23, 2019.

Nilanat pa og duha ka semana o niadtong Enero 7, 2020 una pa niya namatngunan nga siya nasira.

“Secret lover na nako siya gawas sa akong duha ka langyaw nga uyab. Lagot kaayo ko kay sa kadugay na namog sige og sex sulod sa duha ka tuig namong relasyon, naa diay siyay sakit kay nigamit siya og lain. Natakdan ko,” dugang ni Jay.

Gipadayag niya nga enjoy siya sa ilang relasyon kay magpuli-puli sila sa ilang pagpakighilawas.

Siya nanghimakak nga nangayo siya og P15,000 kay wa na madayon niadtong higayona kay naglalis na sila.

Ning bag-o lang ni-chat kaniya si Devon nga magkita sila aron istoryahan ang mga nahitabo kay giingong mopauli na siya sa Britanya.

Pag-abot nila sa usa ka coffee shop sa General Maxilom Avenue, Dakbayan sa Sugbo, gitagaan siya og kwarta.

Dakop na diay kadto kay na-entrap na siya. Iyahang atubangon ang kaso batok kaniya.

Si Ocariza niingon nga ila nang napasakaan og kaso niadtong Lunes sa hapon, Enero 27, si Jay.

Kini naglakip sa kasong grave threat nga kalapasan sa Article 282 sa Revised Penal Code nga dunay silot nga arresto mayor kun pagkabilanggo og usa ka buwan ug usa ka adlaw ngadto sa unom ka buwan o multa nga di molapas sa P500.

Laing kaso nga giduso mao ang kalapasan sa Republic Act (RA) 9995 kun The Anti- Photo and Video Voyeurism Act of 2009 in relation to Section 6 sa Republic Act (RA) 10175 kun Cybercrime Prevention Act of 2012. (GPL)