Kahiusahan maoy nag-unang panawagan ni Presidente Ferdinand ‘Bongbong’ Marcos Jr. atol sa iyang inaugural speech sa National Museum sa Manila kagahapon, Hunyo 30, 2022.

“We will go farther together than against each other,” matod ni Marcos, anak ni anhing Presidente Marcos, Sr. nga napalagpot sa gahom sa miaging 36 ka tuig human sa kapin sa duha ka dekada nga diktadoriya.

Apan sa iyang pamahayag, si Marcos Jr. nidepensa sa legasiya sa iyang amahan nga nakahimo og daghang butang alang sa nasod.

“He got it done, sometimes with the needed support, sometimes without. So will it be with his son,” matod niya uban sa paghugyaw sa iyang mga dumadapig.

“My father built more and better roads, produced more rice than all administrations before his,” dugang niya.

Gidayeg niya ang infrastructure projects sa iyang gisundan nga si Presidente Rodrigo Duterte, kinsa nitapos sa iyang unom ka tuig nga termino kagahapon nga lig-ong lider.

Wala siya molakbit sa kalapasan sa human rights ug plunder nga kaso sa iyang amahan, nagkanayon nga dili siya motuki sa nanglabay apan bahin sa umaabot.

Samtang, ang mga aktibista ug naluwas sa panahon sa Martial law sa iyang amahan, nagpahigayon og protesta sa samang adlaw sa ang-ang sa National Museum.

Apan liboan ka police officers, lakip sa anti-riot contingents, SWAT commandos ug snipers, ang gipangdestino sa bayside tourist district alang sa seguridad.

Si Chinese Vice President Wang Qishan ug ang bana sa U.S. Vice President Kamala Harris nga si Doug Emhoff, lakip sa foreign dignitaries, kinsa ningtambong sa kalihokan nga gihatagan og 21-gun salute, military parade ug air force jet fly-bys.

Samtang ang nagmartsa sa kadalanan nagdala og placards nga dunay nakasuwat nga “Never again to martial law” ug “Reject Marcos-Duterte” nga pasiunang hagit sa unom ka tuig nga termino ni Marcos Jr. isip ika-17 nga presidente sa Pilipinas.

Giila ni Marcos Jr., nga usa ang Pilipinas sa nagrabihan sa epekto sa coronavirus pandemic, tungod sa 60,000 nga namatay ug nalugwayan nga lockdowns nga nakadaut sa ekonomiya nga iyang gihulagway nga worst recession sukad sa World War II ug kakabus, way trabaho ug kagutom.

Dihang niluag na ang pandemiya, niabot ang pag-ataki sa Russia sa Ukraine nga naghatag og global inflation, pagsutoy sa presyo sa lana.

TUTOKAN NI MARCOS

Sa miaging semana, si Marcos Jr. nipahibalo nga siya maoy temporaryong molingkod isip kalihim sa Department of Agriculture (DA) sa pagpangandam sa posibling emerhensiya sa supply sa pagkaon.

Subli nga gipadayag niya sa pakigpulong kagahapon nga tutokan niya ang seguridad sa pagkaon nga alang kaniya, labing importante sa matag pamilya ug nasod nga dili magsalig sa importasyon.

Lakip sa iyang tutokan mao ang edukasyon nga iyang gitudlo si Sara nga kalihim aron pag-andam sa mga tinun-an sa panginahanglan sa paglambo sa ekonomiya sa nasod ug dili mapugos sa pagpanarbaho sa gawas nga dili maayong kahimtang sa trabahoan.

Gisaad sa bag-ong presidente nga ipadayon ang mga proyekto ni Duterte ug mas palambuon kini.

Si Marcos Jr. nakakuha og kapin sa 31 milyunes nga botos ug si Sara Duterte kapin sa 32 milyunes gikan sa kapin sa 55 milyunes nga ningbotar sa Mayo 9, 2022 nga eleksiyon.

Ang BBM-Sara tandem nitala og kasaysayan nga unang majority presidential victory sa Pilipinas sulod sa pipila ka dekada. (AP / RRM)