Gi-reassign si Police Regional Office (PRO) 7 Director Police Brigadier General Jerry Fornaleza Bearis isip director sa Aviation Security Group (Avsegroup) sa Philippine National Police (PNP) subay sa mando sa Camp Crame.

Mihulip niya mao si Police Brigadier General Anthony Abellada Aberin nga sakop sa Philippine National Police Academy (PNPA) Class of 1993, kinsa pangulo sa Avsegroup sa wa pa ang bag-ong lahugay.

Sa usa ka mando nga giisyu ni Lieutenant General Michael John Dubria, hepe sa directorial staff sa PNP, ang reassignment ni Bearis epektibo sa Biyernes, Marso 17, 2023.

Apil usab sa maong kamandoan sa lahugay sila si Major General Oliver Alilis Enmodias kinsa girelibohan sa Area Police Command (APC) Northern Luzon (NL) ngadto sa PNP-Directorate for Research and Development (DRD); Brigadier General Mafelino Aspero Bazar gikan sa PRO Cordillera ngadto sa APC-NL; ug Brigadier General Alden Bacarra Delvo gikan sa APC-Eastern Mindanao paingon sa PRO 11 (Davao).

Na-assign usab sa mga bag-ong puwesto sila si Brigadier General Joel Bargamento Doria sa PRO-Mimaropa, Brigadier General Sidney Sultan Hernia sa PNP-Anti-Cybercrime Group, Brigadier General David Kang-Owan Peredo Jr. sa PRO-Cordillera, Brigadier General Benjamin Habitan Silo Jr. sa Civil Security Group, Brigadier General Andrew Diwayan Cayad sa Directorate for Operations, ug Colonel Romeo Juan Macapaz sa Intelligence Group. (SunStar Philippines)