BIDS and Awards Committee (BAC) sa Kapitolyo nihulagway nga di maki-angayon ang mga pasangil nga duna silay gidapigan o may nakadawat na og komisyon sa bidding nga ilang gihimo alang sa tukoron nga Provincial Resource Center.

Alang ni BAC vice chairman Jone Sepe, bug-at ang mga alegasyon sa korapsiyon ug ang giingong pagdapig nila og usa ka kontraktor sa bidding sa tukoron nga edipisyo.

Kini ilabi na kay wa sila masayod kinsa ang aktwal nga mangapil sa bidding.

Bisan og gihulagway niya nga di makiangayon ang pasangil sa kwestiyonableng transaksiyon, nakasabot si Sepe sanglit sila ang nagdumala sa procurement process.

Gipaniguro hinuon niya nga wa sila magbinoang.

“Unfair unya madaot sad ang credibility nato ana sa procurement group nato ana,” matod ni Sepe.

Gipaniguro sa BAC nga ipasubay sa balaod ang nagpadayon nga post qualification process sa nakadaog nga WT Construction.

Ang ilang technical working group mosusi sa tanang aspeto sa kwalipikasyon sa kontraktor.

Sa pagka-karon, wa makita ni Sepe nga makaapekto sa proseso ang kontrobersiyal nga proyekto sa WT Construction nga mao ang CICC.

Lakip ang kasaysayan niini sa mahimong sutaon sa evaluation. Matod ni Sepe nga human nakumpleto ug nabayran ang pagtrabaho sa CICC nagpasabot lang nga way problema sa istraktura nga natukod.

“Kay kon anaa pa’y issue sa substandard (CICC), nakit-an unta na during the construction period, dili pud unta bayran,” niingon si Sepe. AZLG