NAILHAN na ang lalakeng nalamba samtang nag bike sa Huwebes sa hapon, Oktubre 14, 2021 sa N. Bacalso Avenue, Barangay Lawaan, Dakbayan sa Talisay.

Si Romeo Cinco, 60, taga Barangay Tungkil, Minglanilla, giila sa iyang asawa nga si Norma, kinsa niadto sa Cebu South Medical Center sa Dakbayan sa Talisay sa mga ala 8 sa gabii.

Si Cinco nagsikad sa iyang biseklita padung sa Dakbayan sa Sugbo dihang kalit lang siyang nalamba ug nagkulob sa karsada.

Matod ni Jonathan Tumulak, pangu sa City of Talisay Traffic Operations and Development Authority (CT-TODA), giatake sa kasingkasing si Cinco.

Mao kini hinungdan nga kalit siyang nalamba samtang nagsakay sa biseklita. (REV)