‘FAKE news” ang mga impormasyon nga nagtumbok nga positibo sa Sars-CoV-2, kagaw sa coronavirus disease 2019 (Covid-19), si Bohol Governor Arthur Yap.

Kini ang pamahayag sa executive assistant ni Yap nga si Reyna Clemeña Deloso sa iyang Facebook post taliwa sa mga hungihong nga positibo ang gobernador sa Covid-19.

Si Deloso niingon nga niuli ang mayor sa Bohol niadtong Dominggo, Septiyembre 12, 2021, gikan sa PDP-Laban National Convention nga dunay negatibong resulta sa reverse transcription-polymerase chain reaction (RT-PCR) test.

“This is false. This is a big lie,” matod ni Doloso. “He has not tested positive of the virus ever since,” dugang niya.

Iyang giawhag ang si bisan kinsa nga di gamiton sa pagbinuang ang pagtumbok og tawo nga positibo sa Covid-19 taliwa sa giantos nga pandemic sa katawhan ug niadtong nangasakit niini.

“There are many of our fellow Boholanos who lost loved ones after they tested positive. There are also many who are still struggling to recover,” dugang ni Deloso.

Niadtong Lunes, nakigtagbo si Yap sa mga barangay kapitan ug maoy nangulo sa regular nga tigom sa Bohol Inter-Agency Task Force (BIATF) nga gilangkuban sa mga mayor, municipal health officers, doktor ug pribadong sector nga sakop nianang hapon. (REV)