ADUNAY mga border control checkpoint nga gimontar ang Cebu City Police Office atol sa pagpatuman sa enhanced community quarantine (ECQ) nga gisugdan sa Kagamhanan sa Siyudad sa Sugb o untop alas 12 sa udto sa Sabado, Marso 28, 2020.

Matod ni Police Colonel Hector Grijaldo, officer-in-charge sa CCPO, ang mga border control checkpoint maoy kasamtangang mosusi sa mga tawo nga mosulod sa Dakbayan sa Sugbo.

Gipamutang kini sa utlanan sa Barangay Talamban ug Canduman sa Dakbayan sa Mandaue; North Reclamation Area, habig sa dakbayan sa Sugbo; boundary sa Barangay Gaas, Balamban; ug mga bukirang dapit nga utlanan sa Dakbayan sa Toledo ug South Road Properties, lakip na sa Barangay Bacayan, Dakbayan sa Sugbo nga molahos sa Siyudad sa Mandaue ug Barangay Pit-os, Siyudad sa Sugbo ug Barangay Cabangahan sa Consolacion.

Ang naglangkob sa border control checkpoints mao ang kapulisan, health personnel gikan sa Cebu City Health ug mga sundawo gikan sa Central Command (Centcom).

Gawas sa mga checkpoint sa kapulisan, adunay gimontar ang matag barangay nga quarantine control points diin sila ang mobabag sa mga lumolupyo sa ilang barangay nga motabok sa laing barangay.

“Kanang mga residente mokuha na silag passes, di sila makagawas sa barangay og dili sila otorisado nga mogawas sa barangay. So, kinahanglan silag identification (ID) card,” matod ni Grijaldo.

Nipasabot si Grijaldo nga ang gidid-an lang nga makagawas mao kadtong mga tawo nga wala mag trabaho ug way tuyo sa gawas.

Kadtong mga tawo nga padayon nga nagtrabaho mahimo sila nga makapakita sa ilang ID sa mga checkpoint.

Panawagan niya sa publiko nga dili nalang mogawas tungod kay wala nay masakyan human nga gidid-an na ang mga pampublikong sakyanan nga makabiyahe sugod sa Sabado.

“Ang atong pag imposar sa pag quarantine sa tanang tawo nga dili taga siyudad, kon taga siyudad man, dili magsigeg suroy-suroy kay wala na tay mga sakyanan nga pwede nato magamit aron maka uli ta,” matod ni Grijaldo.

NAABTAN

Kasagaran sa mga naabtan sa pagsira sa Barangay Bulacao, Siyudad sa Sugbo sa borderline area wa pay mga EQ pass.

Gikinahanglan sa usa ka tawo ang pass aron makasulod.

Si Police Maj. John Kareen Escober, hepe sa Pardo Police Station, nangunay sa pagduma sa dapit human giimplimentar ang lockdown sa Barangay Bulacao.

Matod ni Escober nga wa una nila pasudli sud sa 20 minutos aron maplastar ang pagpasulod.

Dugang ni Escober nga dunay gipresentar nga identification (ID) cards ang mga nagmotorsiklo.

“Naa man ta mga exempted nga makasulod ug atong gipasabot sa ilaha. Unya ang uban sab wala pay mga certificate pero ato silang gipang ingnan nga mokuha gyud,”matod ni Escober.

Si Cebu City Councilor Dave Tumulak nga midalikyat sa dapit, nipasabot sa mga tawo nga naabtan sa pagsirado.

Dugang ni Tumulak nga pasabton lang ang mga tawo nga mosulod sa Sugbo.

Samtang ang pampubliko nga mga sakyanan wa na pasudla sa Dakbayan sa Sugbo. / AYB, BBT