HUMAN sa pagpahigayon sa piniliay niadtong Mayo 13, ang mga magtutudlo motutok na usab sa pagpanglimpyo sa mga publikong tunghaan atol sa Brigada Eskwela nga magsugod karong Lunes, Mayo 20.

Bisan kon nahago ang mga magtutudlo sa miaging eleksyon labi na katong dugay nahuman sa pag-transmit sa election returns gikan sa ilang clustered precincts, apan matod Dr. Rhea Mar Angtud, provincial schools division superintendent, nga andam gihapon sila sa Brigada Eskwela.

Sa Sabado, Mayo 18, ilusad sa rehiyonal nga buhatan sa Department of Education sa Central Visayas ang Brigada Eskwela sa Carnaza Elementary School (CES) sa gamay nga isla sa lungsod sa Daanbantayan, amihanang Sugbo.

Sigon ni Angtud gipili ang CES tungod kay nanginahanglan kini og tabang nga maoy concern sa Brigada Eskwela.

Si Angtud nag-awhag sa mga ginikanan ug ubang stakeholders nga moapil sa Brigada Eskwela sugod sa Lunes, Mayo 20, hangtod sa Biyernes, Mayo 24.

Tumong sa usa ka semana nga pagpanglimpyo nga maandam ang mga tunghaan sa pagbukas sa klase karong Hunyo 3.

Iyang gitataw nga way amotan sa Brigada Eskwela kondili ang paghatag og pledge sa mga ginikanan apil ang pagdala og materyales sama sa lansang ug martilyo.

“Labor of love gyud na siya para sa mga bata,” dason niya.

Si Angtud namahayag nga moabot sa 700,000 ang mga tinu-an sa tanang ang-ang sa mga publikong tunghaan ubos sa iyang division, 400,000 niini sa elementarya.

Sa pagbukas sa school year 2019 hangtod sa 2020, ilang nalantawan nga motubo og 2 ngadto sa 5 porsyento ang pagsaka sa enrollment sa mga estudyante sa mga publikong tunghaan. (SCG)