NAGHILAK ang usa ka call center agent nga nisumbong sa pulis sa dakbayan sa Talisay human siya tulisa sa nagpakaaron-ingnong habalhabal drayber kagahapon, Marso 16, pasado alas 5:00 sa buntag, sa Barangay Candulawan sa Talisay.

Iyang tibuok suweldo nahurot og sakiyo sa tulisan nga drayber sa habalhabal.

Si Police Corporal Eufemio Padillos sa Talisay City Police Station nga nahinabi sa Superbalita Cebu niila sa biktima nga si Warjentina Grant, 26, taga Talisay.

Asoy ni Grant ngadto sa mga pulis nga padulong na unta siya mouli sa iyang balay dihang nahitabo ang pagpanulis.

Nasayran nga ang biktima nisakay og habalhabal gikan sa Barangay Bulacao, dakbayan sa Sugbo ug magpahatud unta sa ilang balay sa Baranyay Cansojong sa Talisay.

Apan didto na natingala si Grant human giliko ang motorsiklo paingon sa Barangay Candulawan sa nahisgutang lugar sa suspek.

Siya gitionan sa tulisan sa wala matino nga kalibre sa armas dayon nideklarar og tulis. Walay nabuhat si Grant gawas sa paghatag sa iyang dala nga pitaka kon diin sud ang iyang tibuok suweldo.

Samtang si Police Lieutenant Colonel Randy Caballes, hepe sa Talisay City Police Station, niingon nga ila nang gisubay karon ang posibleng kuha sa CCTV footage sa lugar aron masubay ang panagway sa tulisan.