PAGBUHI sa Halad Inasal Festival malampuson ug mabulukon niadtong Dominggo sa hapon hangtod sa gabii, Oktubre 13.

Si Gobernador Gwedolyn Garcia usa sa pinasidunggang’ dinapit sa kalihukan.

Matod ni Mayor Gerald Anthony Gullas, nakadayeg ang gobernador nga gibuhi ang Halad Inasal Festival ug ubang festival sa kalungsoran sa lalawigan.

Ang Halad Inasal Festival 2019 gisalmutan kini sa 11 ka mga grupo sa mananayaw, lima gikan sa elementarya, upat sa sekondarya sa mga tunghaan sa Talisay.

Anaa usab ang Talisay City College nga mga mananayaw ug representante sa lokal nga kagamhanan sa Talisay.

Ang mga contingent nga gikan sa elementarya ug sekondarya ang lakip sa tigi sa pasundayag.

Pipila sa mga nidaug:

Best in Street Dancing nakakuha sa unang dapit ang Talisay City National High School.

Sa Ritual Showdown (Elementary Category), Grand Champion ang Camp 4 Elementary School ug sa (Secondary Category) nikampeyon ang Talisay City National High School.

Mapasalamaton si Gullas sa aktibo nga pagsalmot sa mga tinun-an, ilabi na sa bukirang barangay.

Ang Street Dancing, Ritual showdown ug bisan ang tigi sa Festival Queen ug Princess ang gidugok sa libuan ka mga Talisaynon ug mga turista.

Gihulagway ni Police Major Orlando Carag, Jr., hepe sa Talisay City Police Station, nga malinawon sa kinatibuk-an ang mga pagsaulog sa kapistahan sa dakbayan. (FMD)