GIPASIDUNGGAN sa National Nutrition Council (NNC) 7 ang dakbayan sa Carcar ug lungsod sa Argao isip usa sa Most Improved LGUs sa Central Visayas sa mga programa niini batok malnutrisyon atol sa Grand Nutrition Awards 2019.

Samtang ang lungsod sa Carmen sa Bohol gipasidunggan na usab isip Outstanding Municipality in the Region Green Banner diin mao na kini ang ilang ikatulo nga tuig nga nakadawat sa maong pasidungog.

Biyernes, Agusto 9, dihang gianunsiyo na sa NNC 7 ang mga LGUs nga gipasidunggan nila tungod sa mga lakang ug programa nga nagtutok sa malnutrisyon sa ilang mga nahinsakopan.

Ang LGU sa Carmen, Bohol gikatakda nga makadawat og P500, 000 isip ganti sa ilang pasidungog nga ihatag karong Agusto 30 sa kaulohan.

Matod sa regional nutrition program coordinator sa NNC 7 Dr. Parolita Mission nga gipaubos sa assessment ug evaluation sa Regional Nutrition evaluation Team ang mga mananaog karong tuiga.

Dugang niya nga kinahanglan nga epiktibo ang usa ka LGU sa pagpatuman niini sa ilang Plan of Action for Nutrition aron pagsulbad sa malnutrisyon, stunting o kining mubo itandi sa iyang pangedaron ug obesity. (HBL)