MIHATAG og ayuda ang Carmen Copper Corporation (CCC) sa siyudad sa Toledo ngadto sa mga pamilya sa mga kawani nga nakalas o missing atol sa trahedya sa pagdahili sa yuta sa minahan niadtong Disyembre 21, Martes, alas 4:15 sa hapon, diin upat na ang kompirmadong nakalas.

Sumala sa pamahayag sa CCC nga gipadala sa Superbalita Cebu, ang kompaniya nihatag og nagkadaiyang pinansyal nga ayuda sa mga pamilya sa mga biktima ug nisaad nga mosuporta sa edukasyon sa ilang mga anak hangtod mograduwar sa kolehiyo.

Lakip sa ayuda sa CCC mao ang pagtanyag og trabaho sa mga sakop sa pamilya ug labing suod nga kabanay ug ang samang tanyag gilugway ngadto sa mga biktima nga ubos sa kontraktor sa minahan.

Sa pagkakaron, ang tagdumala niabag sa imbestigasyon sa Mines and Geosciences Bureau (MGB) ug lokal nga kagamhanan sa Toledo bahin sa trahedya.

Ang CCC nisuspenso una sa tanang kalihokan sa minahan sa pagseguro sa kaluwasan sa ilang mga kawani ug kontraktor sa minahan.

“As of this time, we are in close coordination and communication with the affected immediate families and will continue to extend the needed support and assistance. We humbly ask the general public to exercise caution and responsibility in distributing information out of respect to the affected families,” sumala sa CCC nga namantala sa SunStar Cebu.

“We are also in close coordination and communication with concerned government agencies as we continue to conduct all necessary actions to assess and address the situation,” dason sa CCC. (PR-RRM)