Gitudlo nga acting regional director sa Commission on Elections (Comelec) sa Central Visayas (CV) si Atty. Lionel Marco Castillano, Provincial Election Supervisor (PES) sa lalawigan sa Sugbo sa wala pa ang iyang appointment.

Si Castillano nagkanayon nga iyang ipaduol ang serbisyo sa Comelec ngadto sa komunidad.

Gumikan niini, ang election officers mopahigayon og voters education gawas sa ilang pagpahigayon og satellite registration sugod sa Disyembre 12 hangtod Enero 31, 2023 isip pagpangandam sa SK ug Barangay Elections karong Oktubre 30, 2023.

“Importante kaayo ang pagpasabot sa katawhan dili lamang ang ilang katungod sa pagbotar kon dili apil ang ilang responsibilidad isip botante,” padayag ni Castillano kansang designasyon isip acting RD nagsugod niadtong Nobiyembre 28, 2022.

Ilawom sa liderato sa bag-ong acting regional director nga ubos sa direktiba ni Comelec Chairman George Garcia, mopahigayon usab sila og special registration para sa mga persons deprived of liberty, senior citizens, persons with disability ug pregnant women.

Giawhag usa ni Castillano ang mga senior citizens labi na kadtong mobotar sa mga dagkong siyudad kansang polling precinct nahimutang sa tag-as nga building pag-update sa ilang voter registration para mabuhatan sila og lahi nga polling precinct aron dili na sila mosaka para mobotar sanglit ipahiluna sila sa sayon nga botaranan.

Sa pagkakaron, ang Comelec Regional Office okupado sa ilang panahon pag-andam sa ilang makina nga gamiton sa registration, pag-imprinta sa voters registration forms ug pagpahigayon usab og refresher course sa mga election officers.

Sa pag-asumir ni Castillano isip labing taas nga opisyal sa Comelec-7, nihulip sa iyang posisyon isip PES sa Sugbo si Atty. Edwin Cadungog isip acting samtang si Atty. Ferdinand Gujilde nga maoy Comelec regional attorney maoy acting election officer sa Cebu City south district nga gibakante ni Cadungog. (PAC)