Ang Cebu City Transportation Office (CCTO) mipahimangno sa mga drayber, konduktor ug pasahero sa pampublikong transportasyon nga hugot nilang ipatuman ang mando sa Inter-Agency Task Force (IATF) nga 75 porsyento lang ang pasakyon sa kapasisad sa sakyanan.

Matod sa CCTO nga kinahanglan nga hugot kini nilang ipatuman tungod sa nagsakang mga kaso sa coronavirus disease 2019 (2019).

Sa miaging semana, nakompirmar nga dunay 32 ka mga kaso sa Delta variant sa Sars-CoV-2, kagaw nga hinungdan sa Covid-19, nga mas mananakod ug mas makamatay.

Matod sa CCTO nga ilang dakpon ang driver, konduktor o pasahero nga nakalapas niini.

Posibleng itanggong sa gitagana nga holding area o pamultahon og P500.

Ang holding area sa norte mao ang Cogon Ramos gym. Sa kasadpan mao ang Labangon gym.

Ila usab nga giawhag ang mga modern jeepney kun beep sa pagbukas sa ilang mga bentana ug pultahan.

Kinahanglan ang mga taxi ipaubos ang bildo sa bentana og five inches.

Namatud-an sa mga pagtuon sa mga eksperto nga magpabilin sa hangin sud sa 16 oras ang Delta variant sulod sa sirado nga mga lugar, sama sa lawak ug mga sakyanan.

Ang pagbukas usa ka maayong bentilasyon aron makalapos lapos ra ang hangin nga mas dako ang kahigayunan sa di pagtapot sa kagaw basta sul-ob lang usab ang mask ug faceshield. (REV)