Ang Cebu City Government nakakat-on sa ilang mga leksyon ug mas andam na karon, siyam ka tuig human sa 7.2 magnitude nga linog nga nitay-og sa Probinsiya sa Bohol ug Sugbo niadtong Oktubre 15, 2013.

Si Cebu City Disaster Risk Reduction and Management Council (CCDRRMC) chairman Gerardo Carillo nitug-an sa SunStar Cebu Biyernes, Oktubre 14, 2022, nga ang ilang buhatan nagpahigayon og sunodsunod nga pagbansaybansay aron maandam ang publiko sa bisan unsang katalagman nga mahitabo.

Ang disaster council nagpahigayon usab og regular nga inspeksyon sa integridad sa mga school building ug uban pang mga imprastraktura aron masiguro nga makasugakod kini sa kusog nga linog.

“We will always be prepared but as to the question nga fully prepared ba ta, ang Ginoo ra ang maka tubag ana kon pananglitan pwerte nang kusoga... but we will always prepare ourselves,” matod ni Carillo.

KALIG-ON SA ESTRUKTURA

Si Carillo nitataw nga sa ilang inspeksyon, adunay mokabat sa 20 ka mga school building ang kinahanglan pa nga i-retrofit aron masiguro nga luwas kini sa panahon sa kalamidad.

Matod niya nga nakig-alayon na ang CCDRRMC sa Local School Board alang sa paspas nga rehabilitasyon sa maong mga edipisyo.

Gihisgutan usab ni Carillo nga ang Office of the Building Official naghimo usab sa ilang tahas sa pagmonitor sa integridad sa mga high-rise building ug pribadong istruktura sa dakbayan.

“Kanunay man sila nag-inspection and they will report to the Cebu City Disaster Coordinating Council sa mga updates and so far giplanohan na nila kon unsay ilang buhaton,” matod ni Carillo.

Gi-require usab sa City Government ang mga developer o contractors nga mohimo og soil test sa dili pa magtukod og structure aron masiguro nga luwas ug kasaligan ang yuta, dugang niya.

Atol sa linog niadtong 2013, ang karaang edipisyo sa Cebu City Medical Center (CCMC) nakaangkon og grabeng mga kadaut.