Aron di kaayo mabug-atan ang transport sector sa pagsaka sa presyo sa produktong petrolyo, ang Siyudad sa Sugbo mobutang og temporaryong pumping gas station sa South Road Properties (SRP).

Si Atty. Gerardo “Gerry” Carillo, chairman sa Cebu City Price Monitoring Council, niingon nga si Mayor Michael Rama nimando kaniya sa pagbutang og gas station sa SRP nga motabang sa sektor sa publikong transportasyon.

Busa, di tanang nanag-iya og mga sakyanan ang mahimong makapatubil sa gas station, matod ni Carillo sa interbyu sa Superbalita Cebu sa Sabado, Marso 12.

Alang lang kini sa pampublikong mga bus, PUJs, taxi, mga truck nga nagkarga og mga basic commodity sama sa utanon ug mga pagkaon ingon man service vans.

Ila pa hinuon han-ayon ang mga mekanismo, sama sa paggamit og coupons, aron di kini mapahimudsan.

Niseguro si Carillo nga ang presyo sa lana nga ibaligya sa gas station mas barato og P5 itandi sa pribadong gas stations.

Maseguro kini kay mokuha sila direkta sa supplier sa lana, di sa mga gas station.

Anha kini ibutang sa duol New Normal Oasis for Adaptation and a Home (Noah) complex. Iyang paninguhaon nga mapahimutang kini karong buwana.

Niadtong Marso 8, ang presyo matag litro sa diesel nisaka og P5 samtang P3 sa gasolina.

Sunod semana, mas dakong umento ang gipaabot nga moabot og P8-P12 matag litro.

LIVELIHOOD CENTERS

Ang Siyudad sa Sugbo mobutang og livelihood centers kun mga tindahan nga mamaligya og mas baratong basic commodities.

Kini pinaagi sa abag sa Department of Trade and Industry (DTI) 7 ug Department of Agriculture (DA) 7.

Ang DTI dunay Diskwento Caravan samtang ang DA dunay Kadiwa.

Matod ni Carillo nga nakigtambayayong na usab sila sa organisasyon sa mga mag-uuma aron anha na sila makapamaligya sa ilang mga baligyang utanon.

Ang livelihood centers makapamaligya og karne sa manok, baboy, isda ug mga lagutmon.

Magtagbo pa sila ning semanaha aron mahan-ay ang tanan sama sa desinyo sa sentro ug kon asa kini ibutang.