Sa nakalabay nga tulo ka mga adlaw, ang Cebu City nag-average og 40.42% daily positivity rate (DPR) sa coronavirus disease 2019 (Covid-19) sa Enero 18, 2022.

Kini human nakatala ang Emergency Operations Center (EOC) og 1,713 ka mga nagpositibo sa virus gikan niadtong Enero 15,16 ug 17.

Sa kasamtangan, siyam nalang gikan sa 80 ka barangay sa Cebu City ang way natala nga Covid-19 active cases sa miaging 10 ka adaw.

Sa 71 ka mga barangay nga adunay kaso sa Covid-19, ang Guadalupe maoy nag-una (293, Lahug (177), Apas (163), Capitol Site (120), Tisa (114), Mabolo (109), Labangon (101) ug Camputhaw 100. Kining walo ka mga barangay labing daghan og mga kaso nga nag-3 digit.

Ang laing 63 ka barangay adunay 1 ngadto sa 99 ka aktibong kaso gikan niadtong Enero 8 hangtod Enero 7.

Kagahapon, ang Cebu City nakatala og 677 ka bag-ong mga kaso sa Covid-19 gikan sa 1,548 ka mga individual nga gipaubos sa swab test kun 43.35% DPR ug 72 ang recoveries.

Sa kalit lang, gikan sa upat ka active cases niadtong Enero 1 gikan sa upat ka barangays, karon ang dakbayan aduna nay 3,211 ka aktibong kaso sa Covid-19.