SUBLING nipasidaan ang kapulisan sa Siyudad sa Sugbo nga hugot gidili ang pag-karaoke ug videoke bisan gipaubos na sa general community quarantine ang dakbayan nunot sa pagsugod na sa klase.

Gipahibawo sa kapulisan ang publiko nga sugod sa alas 6:00 sa buntag hangtod sa alas 6:00 sa gabii, hugot nga idili ang pagpatukar sa karaoke ug ang videoke, gikan sa Lunes hangtod sa Sabado.

Tungod niini, ang mga opisyal sa barangay giawhag nga motabang sa pagbadlong sa mga tawo nga magsabasaba sa panahon sa oras ting klase.

Si Police Lieutenant Colonel Wilbert Parilla, deputy city director for operation sa Cebu City Police Office (CCPO), nagkanayon nga ila nang iapil sa oplan nga ‘Ligtas Balik Eskwela’ ang kampanya batok sa pagsabasaba sa kabarangayan diin dunay personnel nga mohimog rekorida sa nagkadaiyang lugar sa dakbayan.

“Ang atong ordinansa sa karaoke ato nasad ibalik og implement.” matod ni Parilla.

Sa miaging tuig, una nang gipatuman ni Police Colonel Josefino Ligan, hepe sa CCPO, ang pagdili sa videoke panahon sa tingklase aron dili matugaw ang mga tinun-an nga na-online classes lakip na ang nag-module.

Daghang mga ginikanan ang nalipay niini sanglit maka tuon na man ang ilang mga anak.

Dugang ni Parilla nga kadtong dili motuman sa anti noise ordinance mamahimong mapasakaan kinig kaso.

Bisan kinsa makadakop apan labing maayo nga moabag ang barangay kung adunay madawat nga reklamo sa ilang residente.

Awhag sa kapulisan sa mga Sugboanon nga tumanon ang lagda sa kagamhanan sa siyudad aron dili kini mag atubang og problema tungod kay modakop gyud ang mga pulis sa malapason. (AYB)