NASURPRISA ang Police Regional Office 7 sa dihang adunay gidugang ang kagamhanan sa dakbayan sa Sugbo nga mga quarantine pass sukad gipatuman na ang general community quarantine.

Adunay 125,000 ka QR coded quarantine passes (QP) sa dakbayan sa Sugbo ang gidugang ug gi apod-apod sa ubang konstituwente sa nagkadaiyang barangay niadtong Hunyo.

Si Mayor Edgardo Labella atol sa gipahigayon nga press briefing Martes, Agosto 4, nipahibawo nga ni-imprinta og 175,000 ka QP ang City Hall isip dugang sa 178,000 nga unang gihatag ngadto sa 80 ka barangay.

Kini gumikan sa daghang reklamo gikan sa mga dagkong barangay nga wa maapod ngadto sa ilang residente ilabi na sa mga barangay nga daghan ang populasyon.

Apan si City Administrator Floro Casas Jr., kinsa maoy gitahasan ni Labella sa pagpanghatag sa mga QP, niingon nga wala mahurot ang ilang gi-imprinta ug adunay 50,000 ka QP ang nahabilin sa iyang buhatan.

Si Casas nagkanayon nga sa wala pa sila mohatag og dugang QP, ilang gipahibawo si retired Major General Mel Feliciano, deputy chief implementer sa Inter-Agency Task Force-Visayas nga maoy trusted general ni Secretary Roy Cimatu, ang overseer sa IATF Visayas.

Apan ang hepe sa PRO7 Police Brigadier General Albert Ignatius Ferro nabalaka nga basin mosaka ang kaso sa coronavirus disease 2019.

Matod sa heneral nga wala mokonsulta sa Regional Inter-Agency Task Force ang Cebu City hall labot sa maong pagdugang sa mga Qpass.

Iyang gipasabot nga ang tanang mga desisyon sa local nga kagamhanan kinahanglan masayod ug adunay pagtugot sa IATF nga gipangulohan ni Secretary Roy Cimatu.

Lakip nga iyang gikuwestion ang pagtugot sa siyudad nga mahimo nang makagawas ang nga tawo sa Dominggo. Matod pa niya nga ang tanang polisiya ipaagi kini sa hustong ahensiya nga mao ang IATF nga maoy nag supervise sa covid 19.

Nagpadayon ang pagpatrolya sa mga pulis aron dakpon ang mga nakalapas sa minimum health standard ug nagpalupad og drones aron pagsusi sa areas nga dili maabot og patrolya sa PNP. (AYB, PAC)