Napanalipdan pag-usab sa kagamhanan sa Probinsya sa Sugbo sa ika-unom nga higayon ang pwesto isip labing adunahan nga Probinsya sa nasud subay sa uwahing financial report sa Commission on Audit (COA) sa 2019.

Ang Probinsya sa Sugbo ginganlan nga labing adunahan nga Probinsya subay sa P203.9 bilyones nga assets niini.

Kon itandi sa P35.65 bilyones sa 2018, nisaka og 471.9 percent ang total assets sa Probinsya.

Gawas sa Sugbo, ikaduha nga labing dato nga Probinsya ang Batangas nga may P20.79 bilyones samtang ika-tulo ang Rizal nga may P20.28 bilyones nga assets. Nalakip usab sa listahan sa ikaupat nga pwesto ang Davao de Oro (P20.10 billion), ika-lima ang Bukidnon nga may P18.29 billion assets.

Si Cebu Governor Gwendolyn Garcia nagkanayon nga usa sa labing dako og gikatampo sa pagsaka sa assets sa Probinsya ang pag re-appraise sa properties, collection sa quarry, terminals ug uban pa.

“When I took over pagka July, I asked the assessors office to reassess all of our properties in accordance with present value, kay wa man gyud na ma reappraise since 2008. Wa na man na mausab og reappraise so pila naman na ka tuig, 12 years na... Since daghan kaayo tag yuta dinhi sa City of Cebu, where property value have been quadrupled over the years, mao ning rason nga nisaka ang atong assets,” matod ni Garcia sa mga tigbalita sa Enero 14.

Sa assets, P196 bilyones niini ang properties samtang moabot sa P7.7 billion ang cash. / ANV