Ang Cebu Railway ug Bus Rapid Transit (BRT) system nalakip sa mga transportation project nga gusto ni Presidente Ferdinand Marcos Jr. nga mapadayon ang pagpatuman.

Sa iyang labing unang State of the Nation Address (Sona), si Marcos nisaad nga iyang himuong moderno ang transport system sa nasod, apil na ang railway system sa Sugbo ug Bus Rapid Transit (BRT) system sa Siyudad sa Sugbo.

Gihisgutan niya ang mga proyekto sa riles, nga giingon niya nga ipasalig sa iyang administrasyon nga matapos.

Kini naglakip sa North-South Commuter Railway System; 33-kilometros nga Metro Manila Subway Project; 147-kilometros North-South Commuter Railway System; 12-kilometros LRT-1 Cavite Extension; 23-kilometros nga MRT-7; Common Station nga magkonektar sa LRT-1, MRT-3 ug MRT-7; 102-kilometros nga Mindanao Railway Project; Panay Railway Project; ug railway system sa Sugbo.

Matod niya nga pauswagon usab niya ang mga dalan ug sistema sa transportasyon sa Pilipinas pinaagi sa mga proyekto sama sa Cebu Bus Rapid Transit, Davao High Priority Bus System, Ilocos Norte Transportation Hub, ug El Nido Transport Terminal.

“My order to the Department of Transportation or DOTr is really very simple: Full speed ahead,” matod niya.

Niadtong bag-o pang nangatungdanan si anhing Cebu City Mayor Edgardo Labella sa 2019, siya nipadayag og suporta sa monorail project nga giplano sa Dept. of Transportation (DOTr) isip backbone sa Integrated Intermodal Transportation System (IITS) sa Metro Cebu.

Kini nga proyekto gitawag og Cebu Rail Project nga idugtong sa BRT.

FACE-TO-FACE

Gisubli ni Marcos sa iyang unang Sona nga panahon na alang sa mga estudyante nga mobalik sa hingpit nga face-to-face nga mga klase.

Matod niya nga ang Department of Education (DepEd), nga gipangulohan sa kalihim niini nga si Bise Presidente Sara Duterte, nangandam na alang sa pagpatuman niini sa umaabot nga school year “with utmost consideration of the students and teachers’ safety.”

Nanawagan siya sa publiko nga magkuha og booster shots aron mapalig-on ang ilang depensa batok sa Covid-19 karon nga mobalik na sa eskwelahan ang mga estudyante.

Gitahasan ni Marcos ang Dept. of Health (DOH) ug Department of the Interior and Local Government (DILG) sa paghimo og laing rollout sa booster shots.

“The condition and available of school rooms must also be addressed in coordination with DPWH,” dugang niya.

MGA REAKSYON

Si Cebu City South District representative Eduardo “Edu” Rama mibati og kadasig human nadungog ang Sona ni Marcos.

Si Rama nitug-an sa SunStar Cebu nga ang Sona sa Presidente mihatag og klarong dalan sa pag-uswag sa ekonomiya sa nasud.

Si Gobernador Gwendolyn Garcia, sa iyang bahin, nakadayeg sa Sona ni Marcos Jr. nga iyang gihulagway nga dunay konkretong mga plano.

Kini labina kay iya gyud nga gihisgutan ang Cebu kalabot sa mga imprastraktura.

“The President’s overall plans are in synch with Cebu’s direction. Finally, I applauded the loudest when he stated emphatically: ‘No more lockdowns.’ (TPM sa SunStar Philippines, REV)