Way gana si Lapu-Lapu City Mayor Junard “Ahong” Chan sa pagduso sa pagtukod og 600-megawatt liquified natural gas (LNG) power plant sa dakbayan kon mapamatud-an nga makadaot kini sa publiko ug sa kinaiyahan.

Si Chan niluwat sa pamahayag human niya nahibaw-an nga ang mga civic groups, lakip ang Philippine Movement for Climate Justice (PMCJ) Cebu Chapter ug Center for Energy and Development (CEED), nihimo og protesta batok sa pagtukod sa power plant sa Barangay Poblacion atol sa pagtimaan sa World Environment Day niadtong Hunyo 5, 2022.

“Let’s be fair nga tagaan sa nato ang proponent og matubag nila ang mga issues and concerns sa mga tawo. So, if dili makaayo sa atong mga katawhan, Why not? Nganong ato mang ipadayon kon makadaot?,” matod ni sa Chan sa Miyerkules, Hunyo 15.

Ang mayor niingon nga nakig-estorya na siya sa project proponent, ug gani, gi-reschedule ang public hearing sulod sa mga tulo ka buwan.

Si Chan niingon nga ang maong lakang gihimo aron mahatagan og panahon ang proponent, kinsa sa sayo pa nga wala nakaandam atol sa ilang presentasiyon, sa pag-andam sa ilang kaugalingon karong panahona sa pagtubag sa mga kabalaka sa stakeholders, lakip na sa environmentalists.

Giklaro usab niya nga wala pa’y scheduled construction sanglit anaa pa sila sa consultation process o public hearing diin mag-imbitar sila og lainlaing sektor nga hingtungdan alang sa maong proyekto.

“Ang ato ra gyud nga gitan-aw nga makaayo siya sa kinatibuk-an nga dili makadaot sa atong kinaiyahan,” dugang ni Chan.

Gipasiugdahan sa mga civic group ang “Pedal for People and Plant,” diin nagprotesta sila gamit ang ilang mga bisikleta gikan sa Mactan Shrine sa Lapu-Lapu City ug nipaingon sa nahimutangan sa P60 bilyones nga LNG plant nga giduso sa San Miguel Corporation (SMC) Global Power.

Giangkon sa mga grupo nga ang operasiyon sa gisugyot nga planta sa kuryente magdala lamang og kadaot sa publiko ug kinaiyahan taliwala sa emerhensya sa klima nga nasinati sa tibuok kalibutan.