Gibutyag ni Lapu-Lapu City Mayor Junard Chan nga nangita na lang siya og kaugalingong pundo nga mapadayon ang paghatag og mga pagkaon sa volunteers sa nagkadaiyang vaccination sites sa dakbayan.

Kini human nga padayong nadelatar sa konseho ang iyang gipangayong Supplemental Budget No. 3 diin kuhaon ang kalabot sa Covid response sa dakbayan nga naglakip sa mga pagkaon alang sa mga volunteers.

Matod sa mayor niadtong Septiyembre 10 ra ang katapusang budget alang sa mga pagkaon sa mga personnel nga nangalagad sa dakbayan kalabot sa Covid-19 nga naglakip gani sa kapulisan.

Subling giawhag sa mayor ang konseho sa dakbayan nga ihikling una ang pamolitika ug ipasar na ang iyang gipangayong gahin kay alang kini sa katawhan.

Wala mahimuot si Chan sa mga konsehal sa dakbayan nga hilabihan kakuti sa gipangayong liquidation sa kagamhanan nga unta natubag naman sa mga taga accounting office ug City Social Welfare and Development Office (CSWDO) ang ilang mga pangutana.

Gikuwestyon ni Chan nga mas daling napasar sa konseho ang resolusyon nga nag-awhag sa Department of Environment and Natural Resources (DENR) sa paghatag og area clearance sa Mactan North Reclamation Project sa Barangay Ibo bisan kun aduna pa unta kini pending kaso sa Court of Appeals kaysa sa budget nga iyang gipangayo.

“Ayaw mo paghisgot ug unsay nahuman na, ang ato focusan ug unsay unod sa SB 3,” matod ni Chan. (GCM)