NAKAUYON si Lapu-Lapu City Mayor Junard Chan nga gipaubos gihapon sa modified enhanced community qurantine (MECQ) ang dakbayan uban sa dakbayan sa Sugbo ug Mandaue hangtod sa Septiyembre 7.

Matod ni Chan, bisan inanay na nga mikunhod ang kaso sa coronavirus disease 2019 (Covid-19) sa dakbayan ngadto sa double digits matag adlaw gikan sa triple digits, dili gihapon angayan mokompiyansa.

Dili na usab ingon ana kadaghan ang naghuwat nga maatiman sa mga tambalanan sumala sa mayor.

Dili usab mahimong ilahi ang dakbayan sa status sa Mandaue ug Cebu sanglit ang tulo dugtong lang.

Nanghinaot siya sa pagpaubos sa dakbayan sa MECQ, hayan mokunhod ngadto sa single digit ang kaso sa Covid-19 sa dakbayan.

Gibutyag ni Chan nga sama sa ilang gibuhat sukad na MECQ ang dakbayan sa buwan sa Agusto ila karong paspasan gihapon ang pagpamakuna ngadto sa mga Oponganon.

Karong Huwebes, Septiyembre 2, hayan ila nang sugdan ang drive-thru vaccination sa Liberty Shrine sa Barangay Mactan alang sa mga tricycle driver ug driver sa pampublikong transportasyon.

Kun ugaling ilang makita nga daghan ang mopahimulos niini hayan mag-abli sila ug laing drive-thru vaccination sa parking lot sa Mactan Cebu International Airport (MCIA) Lapulapu International Terminal.

Subling gipahinumdom ni Chan ang mga Oponganon nga ang pagpabakuna maoy bugtong paagi nga malikay sa grabeng epekto sa Covid-19.(GCM)