MOABOT sa unom ka mga classroom ang naugdaw sa sunog nga niulbo sa Colawin Elementary School sa Barangay Colawin, lungsod sa Argao, habagatang Sugbo, niadtong Dominggo sa hapon, Hunyo 23.

Si FO3 Ardenton Sardido, duty investigator sa Argao Fire Station, niingon nga nadawat nila ang alarma alas 2:27 sa hapon.

Niabot og P3,840,000 ang danyos sa sunog.

“Since we are located more than 20 kilometers away from the site of the fire, we raised to second alarm and responded to the mountain barangay of Colawin with two firetrucks including the one from the Sibonga Fire Station,” sigon ni Sardido dihang nahinabi sa SunStar Cebu.

Nitabang og pawong sa kayo ang mga molupyo sa dapit.

Ang unom ka classrooms nga naugdaw kay nahimutang sa duha ka managlahi nga edipisyo sa compound sa tunghaan.

Sa unang building, ang mga lawak saringan sa Grade 1, Grade 2 ug Grade 4 ang gilamoy sa kayo.

Sa ikaduhang edipisyo, ang classrooms sa Grade 4, Grade 5 ug Grade 6 ang naugdaw.

Sigon ni Sardido ang pagkatap sa kayo nakontrolar alas 3:05 sa hapon ug gideklarar nga fire out alas 5:24 sa hapon.

Matod niya, posible nga may kalambigitan sa linya sa kuryente ang hinungdan sa sunog, apan ila pa kini nga imbestigahon.

Gawas sa estruktura, nasunog usab og apil ang mga libro ug mga lingkuran sa mga estudyante apil ang mga kisame sa mga lawak saringan.

Wa pa matino kon asa magklase karon ang nag-okupar sa nasunog nga mga lawak. (Gihubad ni SCG)