Ang mga kawani sa CLOSAP ubos sa Office of the Mayor sa Lapu-Lapu City nga gipangulohan sa executive director Garry Lao ang gihatagan og higayon nga makaduaw sa Lungsod sa Bangar, Lalawigan sa La Union aron nga masud-ong ug matun-an ang gipatuman nga drug rehabilitation program sa maong dapit.

Ang maong grupo gipadala ni Mayor Junard Chan sa pagduaw sa Bangar’s ‘Balay Silangan’ Reformation Center, usa ka community-based reformation program diin i-rehab kadtong nagumon sa ginadiling drugas kun ‘persons who use drugs’ (PWUDs).

“This immersion is very helpful to us as we come to know and learn about so many things in running Balay Silangan. By seeing it, it is challenging but we are committed to making it happen in Lapu-Lapu City,” matod pa ni Lao.

Ang kagamhanan sa Lapu-Lapu nagtinguha nga moabli sab og kaugalingong rehabilitation center ning tuiga.

Ang ‘Balay Silangan’ usa ka national drug reformation program nga gitukod sa Philippine Drug-Enforcement Agency (PDEA) nga gipatuman inabagan sa PNP ug sa host LGUs, sa katuyoan nga magbag-o ang mga drug dependent aron makaangkon og mahayag nga kaugmaon human sa rehabilitasyon.