Usa ka construction worker patay human ang iyang motorsiklo nibangga sa fire hydrant sa national highway sa Barangay Cogon, dakbayan sa Bogo, alas 2:10 sa kaadlawon sa Biyernes, Mayo 27.

Si Jhon Pagubo Nuñez, 23, ulitawo, ug taga Purok 1 Tagnonok, Barangay Salag, lungsod sa Tabogon, patay na dihang nidangat sa tambalanan sa dakbayan sa Bogo.

Ang biktima gikatahong wala mag-helmet, nakaangkog grabing kadaot sa ulo ug lawas.

Si Police Chief Master Sgt. George Ocena, imbestigator sa Bogo City Police Station nga nahinabi sa Superbalita Cebu, nagkanayon nga ang biktima kusog nga nakapadagan sa iyang motorsiklo padulong mopauli.

Sa pag-abot sa nahisgutang lugar, ni-overtake sa usa ka tanker truck pero nawad-an sa kontrol sa manobela busa wala makabawi ang drayber ug nidiretso sa pagkabangga sa fire hydrant.

Gumikan sa kakusog sa impact ug wala pa mag-helmet ang drayber, namatay kini tungod sa grabeng samad sa ulo niini.

Matud ni Police Chief Master Sgt. Ocena, nga wala nila isalikway ang posibilidad nga nakainom ang biktima nga gikan sa piyesta sa dakbayan sa Bogo.