SA buwan sa Agosto o Septiyembre na ipatuman ang moratorium sa Cebu Provincial Detention and Rehabilitation Center (CPDRC) sa pagdawat og dugang piniriso.

Giandam na sa tagdumala sa prisohan ang draft letter nga maoy ipadala sa mga huwes ug gipanghinaot sa provincial jail nga paboran sa mga korte ang ilang hangyo.

Giklaro sa CPDRC nga wala pa gipatuman sa pagka-karon ang dili na pagdawat ug dugang piniriso sa ilang pasilidad.

Gipasabot ni Atty. Williman Boco nga kinahanglan pang pahibaw-on ang korte labot niini.

Hinuon gitug-an ni Boco nga naandam na ang draft letter nga maoy ipadala sa mga huwes aron paghangyo nga dili una ipa-commit sa CPDRC ang dugang piniriso gikan sa kalungsuran tungod sa kapuno na niini.

Anaa na sa dul-an 4,000 ang ihap sa mga piniriso sa CPDRC.

Gipasabot nga ang CPDRC aduna ray 1,500 inmates ang capacity ug limitado usab ang ilang security personnel og gikabalak-an nga dili na unya makahatag pa ug igong seguridad ngadto sa mga piniriso kon mosubra pa kini sa 4,000.

Kon makuha-kuhaan ang gidaghanon sa mga piniriso nunot sa nagkadaiyang lakang sa CPDRC management alang sa jail decongestion.

Misaad si Atty. Boco nga mopahibalo gilayon sila sa korte sa kalambuan sa maong pasilidad sa higayon nga andam na sila nga modawat ug dugang binilanggo.

Una nang nipatuman ang moratorium sa pagpanawat ug dugang inmates ang CPDRC niadtong Agosto sa tuig 2016 apan gilibkas kini niadtong Abril sa miaging tuig. (AZLG)