SUKAD nibiya ang Special Action Force (saf) sa siyudad sa Sugbo aron mobalik sa National Capital Region Police Office, nakasikop ang Crisis Response Battalion (CRB) nga maoy gihulip, og 227 ka mga tawo nga nakalapas sa quarantine protocol.

Ang ilang mga nangadakpan gi-turnover ngadto sa Prevention, Restoration, Order, Beautification and Enhancement (PROBE) team sa Plaza Independencia alang sa silot nga ipahamtang kanila.

Kasagaran sa kalapasan wala motuman sa minimum health standard sama sa social distancing ug wa magsul-ob og face mask.

Nagtuo ang maong mga tawo nga human mibiya sa Sugbo ang mga sakop sa SAF, mahimo na sila nga makagawas-gawas nga way mga quarantine pass. Matod ni Ferro nga magpadayon ang ilang pagpatrolya ilabi na sa sudlonon nga mga barangay.

Magpalupad usab silag drone alang sa ilang monitoring kon nasunod ba ang executive order sa Kagamhanan sa Dakbayan sa Sugbo.

GCQ GIHAPON

Samtang pangu sa Police Regional Office 7 morekomendar sa inter-Agency Task Force (IATF) nga ipabilin lang una sa general community quarantine (GCQ) ang Dakbayan sa Sugbo bisan kon nag-anam nag ubos ang mga kaso sa coronavirus disease 2019 (Covid-19) sa nanglabay nga mga adlaw.

Sa Lunes, Agusto 17, moanunsyo na usab si Presidente Rodrigo Duterte labot sa bag-ong quarantine classification sa matag dapit sa nasud diin gipaabot kini sa tanang local government units.

Apan matod ni Police Brigadier General Albert Ignatius Ferro nga iyang irekomendar ngadto sa Regional IATF nga ipabilin lang una sa GCA ang dakbayan.

Pasabot sa heneral nga di pa angay nga mokompyansa ang mga Sugboanon niining maayong kalamboan tungod kay mahimong mobalik ang gidaghanon sa mga matakdan kong magpabadlong ang katawhan.

“I would like to recommend that the status of Cebu City will remain at GCQ until we’re able to firmly believe that ang atong kahimanwa diri sa Cebu have imbibe or institutionalize the practice of minimum health standard,” matod ni Ferro.

Dugang ni Ferro nga kinahanglan nga adunay himuon nga assessment ang Kagamhanan sa Dakbayan kon andam na ba ang katawhan kon ibalik na sa mas luag nga community quarantine.

Ipadayon gihapon sa kapulisan ang mga checkpoint nga gipang montar sa nag-unang kadalanan aron masiguro nga ang nanggawas adunay quarantine pass. / AYB