GIAWHAG sa konseho ang Cebu City Transportation Office (CCTO) paggahin sa tuo nga kinadaplinan nga linya sa duha ka mga karsada sa Cebu South Coastal Road habig sa South Road Properties para sa mga motorcycle rider.

Si Konsehal Joel Garganera maoy nipalabang sa resolution pinaagi sa iyang privilege speech sa Martes, Oktubre 15, atol sa regular session sa Konseho.

Tumong niini para malikayan ang disgrasya nga sagad naglambigit og mga motorsiklo.

“In Cebu City, vehicular accident is a daily occurrence and the major ones usually happen at the SRP. Most vehicular accidents are caused by over speeding, overtaking, reckless driving and violation of traffic laws and every year, the number of people who are dying due to vehicular accidents are increasing,” matod ni Garganera.

Ang kinadaplinan sa walang bahin sa karsada sa CSCR maoy itagana para ngadto sa mga sakyanan nga kusog mopadagan.

Si Garganera nagkanayon nga kon di i-regulate sa City Government ang CSCR habig sa Dakbayan sa Sugbo, posible nga aduna pay daghang mga kinabuhi nga makalas gumikan sa disgrasya.

Labing uwahi nga namatay sa disgrasya mao ang usa ka lalakeng trabahante.

Naigo sa awto nga nisaka sa traffic island mao si Marjun Paragoso, 27, taga Dakbayan sa Naga, kinsa nagmaneho sa iyang motorsiklo.

Hinuon ang aksidente nahitabo sa habig sa CSCR sa Dakbayan sa Talisay.

Gihulagway ni Garganera nga magpatuyang og dagan ang mga sakyanan apil na ang mga motorsiklo sa CSCR sanglit gikan sa Plaza Independencia paingon paigon sa sityo Laray, Barangay San Roque, Talisay City, moabot og 10 kilometros ang distansya sa di pa moabot sa laing traffic light.

Gumikan niini, giawhag usab nila ang CCTO sa estriktong pagpatuman sa speed limit sa tanang mga sakyanan nga molagbas sa maong karsada.