MGA kawani ubos sa inspectorate ug regulatory divisions sa National Food Authority (NFA) ang mamahimong mawagtangan og trabaho inig hingpit nang mapatuman ang Rice Tariffication Law.

Kini mao ang gibutyag ni Department of Agriculture (DA) Secretary Emmanuel Piñol atol sa iyang pagbisita sa lalawigan sa Bohol niadtong Sabado, Marso 1.

Una nang nitumaw ang maong taho human gipahibawo nga sagad sa mga responsibilidad sa NFA mapunta na sa DA.

Kahinumduman nga nipadayag sa ilang pagsupak sa pagpatuman sa bag-ong balaod ang mga kawani sa NFA sa hilom nga protesta pinaagi sa pagsul-ob og itom nga armband.

Padayon pa gihapon ang gihimong pag-consolidate sa DA sa resulta sa ilang nahimong konsultasyon may labot sa paggama sa implementing rules and guidelines (IRR) sa bag-ong balaodnon.

Ang Rice Tariffication Act o ang Republic Act 11203 gipirmahan ni Presidente Rodrigo Duterte niadtong Pebrero 14.

Gipasabot ni Piñol nga duha ang positibo nga impact sa pagpatuman niini.

Duha sa iyang gitumbok mao ang pagkunhod sa presyo sa bugas ug ang pagtangtang na unya sa suggested retail price (SRP) sa mga ibaligya nga bugas.

“When rice tariffication law will be in effect, there will be no more SRP. Ang SRP gipatuman sa NFA. Since NFA will no longer have regulatory powers, wala na sab ang SRP,” matod ni Piñol. (HBL)