BISAN sa mga gi-deploy nga kapulisan sa Mandaue-Lapu-Lapu bridge, daghan gihapong buot mosuway og ambak sa maong taytayan.

Sobra sa upat ka mga tawo ang narespondehan dayon sa kapulisan nga misuway og layat sa bridge sukad niadtong dunay usa ka menor de edad nga nakalayat gyud sa bridge karong tuiga, sigon ni P/Col. Jonathan Abella, hepe sa Mandaue City Police Office (MCPO)

“Kaning mga ni-attempt og layat puro adunay problema sa pamilya,” sigon ni Abella.

Epektibo ang pagbutang og pulis sa bridge, dugang niya, aron mas dali nga mapugngan ang mga problemado nga gustong molayat.

“Makita man gud nato nga kung makakita sila og police magduhaduha na sila og layat ug ang atong mga police kung makabantay sila og wala na sa ilang kaugalingon ilaha sad dayong i-approach,” sigon ni Abella.

Aron sab nga mas epektibo ang pagresponde sa kapulisan gipaubos kini og usa ka seminar kabahin sa unsaon pagresponde sa tawo nga magpakamatay.

“Unique man gud ang bata nga mag-suicide so kinahanglan nga naay maayo nga intervention sa atong mga police nga bisan og atong ma-pacify ug ma-calm down ang ni-attempt kay molayat na hinoon, mao nang magpaseminar mi,” dugang ni Abella.

Dason niya nga kining maong seminar kabahin sa unsaon pagtubag sa mga posibleng magpakamatay niadtong Nobiyembre 3, 2019 kon diin gitambungan kini sa tanang kapulisan sa MCPO headquarters.

Ug alang ni Abella, nga mas andam og mas daghan nang nahibaw-an ang kapulisan sa pagresponde niining mga insidente.

Sa pagkakaron, padayon ang pag-deploy og mga pulis ngadto sa mga taytayan matag alas 6:00 sa gabii hangtod sa alas 5:00 sa buntag.

Matag buntag, sigon ni Abella, gihangyo niya ang mga barangay nga mag-deploy og mga tanod. (KFD)