Tungod sa nagkahulpa nga yuta, ang sementadong national highway sa Barangay Guadalupe, dakbayan sa Carcar nangliki nga nakabalda sa trapiko sa dapit.

Si konsehal Rey Anthony Lawas sa Guadalupe nga nahinabi sa Superbalita Cebu nagkanayon nga dali silang nanawag sa Department of Public Works and Highways (DPWH) aron pagtaho bahin sa kahimtang sa dalan.

Matod ni Lawas, nakamugna kini og kahuot sa dagan sa trapiko tungod sa paglikay sa mga sakyanan sa liki sa dalan.

Ang barangay nagdestino og mga tanod uban sa kapulisan nga ning-abag sa trapiko aron magpuli-puli sa usa ka lane.

Si Engr. Michelle Salvador sa DPWH 2nd Engineering District, nangulo sa pagsusi sa dalan ug nikompirmar sa Superbalita Cebu nga ang karsada sa nahisgutang lugar nahimutang sa usa ka fault line.

Matod ni Salvador, bisan unsaon og tambak ug kongkretuhon og balik ang dalan walay kapuslanan human magsige gihapon kini sa pagkahunlak.

“Temporary lang ni atong pagtambak kay nagkinahanglang pa ta sa feasibility study. Atong mapangitaag remedy aron dili magbalikbalik nga moliki ang karsada..,” dugang ni Salvador.

Sa pagsusi ni Salvador, nipasalig siya nga ilang paningkamutan nga makaagi gihapon ang dagkong sakyanan.

Gibutyag sa enhenyero nga ang fault line nagsubay sa ilawom sa karsada sa Sitio Graje sa Guadalupe sa Carcar nga sumpay sa fault line gikan sa lungsod sa Dumanjug, lungsod sa Sibonga ug lahos ngadto sa dakbayan sa Toledo.

Usa sa ilang gisugyot ni Salvador mao ang pagtukod og bridge-type nga karsada sa dapit aron kon molihok ang yuta sa ilawom, makaagi gihapon ang mga sakyanan.

Matod niya nga ilawom sa dapit dunay tubig hinungdan nga humok kaayo ug makita sa kilid sa karsada diin mihulpa gilamoy ang mga yuta.

Awhag niya sa mga motorista sa lugar nga adto moagi sa diversion roads aron malikay sa risgo ug trapiko.

Si Lawas niingon nga nanghinaut ang barangay nga mapadali ang aksiyon sa DPWH.

Laing hulga, matod ni Lawas, mao ang daghang mga landslide ug pagkaguba sa mga riprap nunot sa pagsige og uwan.

Nangayo na sila og tabang sa Kagamhanan sa Dakbayan.

Gibutyag ni Lawas nga nahitabo na ang pagkahulpa sa dalan sa Sitio Graje niadtong 1976 ug dekada 80s diin usa ka balay ang gilamoy sa yuta.

Ang fault line dakong liki o bakante sa ilawom sa yuta nga hinungdan usahay sa linog kon dunay dakong pagkatumpag o pagkakankan sa yuta.