KASAMTANGANG gisuspenso sa Mandaue City Jail ang dalaw samtang magpadayon ang imbestigasyon sa Bureau of Jail management and Penology (BJMP) kalabot sa kamatayon sa giilang drug lord nga si Steve Go kinsa giulo pagpusil sa kauban ra niini sa selda niadtong Martes.

Hangtod di mahuman ang imbestigasyon, matod ni jail warden Supt. Jessie Calumpang nga wa unay pasudlon sa pasilidad nga bisita.

Gitutukan sa BJMP kon giunsa pagsulod sa armas nga gigamit ni Cresenciano Heyrana, 41, taga. Barangay Tawason, sa mao nga dakbayan.

Ang maong armas gikatahong gipanag-iya ni Go.

Gitug-an ni Calumpang nga niadtong Hunyo 14, usa ka adlaw sa labing uwahing greyhound operation sa pasilidad, adunay nahitabong kagubot sa likod nga bahin sa city jail habig sa may LTO building.

Sa pakisusi sa mga kawani sa bilangguan, adunay nakuha nga nagbitay nga nylon nga posibleng gigamit sa pagpalusot sa kontrabando.

“Most probably, before ato nga time, nakapasulod na sila og gamit niadtong June 14,” ni Calumpang sa mga tigbalita.

May nakita sab silang Calumpang nga parte sa edipisyo nga gilungagan ug duda niini nga usa sab kini sa gipaagian sa kontrabando.

Bisan pa sa ilang gihimong Oplan Linis niadtong Biyernes, nagduda si Calumpang nga maayo pagkatago ni Go ang armas, nga gituohang nailog ni Heyrana ug maoy gigamit sa pagpamusil. (JPP)