KAPIN sa P80 milyunes nga balor sa bag-ong police station sa Dakbayan sa Danao nga inagurahan sa kagamhanan sa Siyudad sa Danao uban sa Philippine National Police (PNP) karong Biyernes, Abril 30, 2021.

Matod ni Police Lieutenant Colonel Maria Theresa Macatangay, hepe sa Danao City Police Office(DCPO), nga ang pag-turn over sa labing dako nga edipisyo sa police station sa tibuok nasud tambongan ni PNP Chief General Debold Sinas.

Uban niini ang mga opisyal sa siyudad sa pagpangulo ni Mayor Ramonito Durano lll ug sa kagamhanan sa lalawigan sa Sugbo.

Pasabot ni Macatangay nga ang maong bag-ong building kompleto na ug gi gastohan kini sa kagamhanan sa Danao.

“This building is four storeys and fully furnished with all expenses paid by Danao City,” matod ni Macatangay.

Lima ka tuig na ang nakalabay human masunog ang karaan nga police station sa Danao nga nahimutang daplin sa karsada misaad dayon ang lokal nga kagamhanan nga tukuran silag dako nga edipisyo aron magamit sa kapulisan.

Bisan usa ka piso walay nagasto ang PNP, matod ni Macatangay, human ang tanan nga gamit niini gipalit sa city hall lakip na ang bayad sa kuryente.

Giklaro niya nga dili kini hingpit nga mapanag-iya sa PNP ang bag-ong building sanglit gipaagi kinig usufruct ug sulod sa 25 ka tuig mahimong ibalik kini sa kagamhanan sa Danao.

Gipasalamatan ni Macatangay ang mga kompanya sa maong siyudad nga mitabang sa mga programa sa kapulisan ilabi na sa ilang kampanya batok kriminalidad. (AYB)