Gi-ban na sa Kagamhanan sa Dakbayan sa Danao ang pagsulod sa mga buhi ug produktong baboy gikan sa dakbayan sa Carcar.

Si Danao City Mayor Mix Durano niluwat og Executive Order No. 20, nga temporaryong nagdili sa pagsulod lakip sa mga buhing baboy gikan sa Negros Oriental subay sa pagka-detect sa African swine fever (ASF) sa maong siyudad atol sa ASF surveillance sa mga veterinarian.

“Sa sunodsunod nila nga imbestigasyon, nasayran nga ang maong mga baboy gitago sa mga barangay stockyard uban sa mga baboy nga gikan sa Negros Island,” asoy sa LGU Danao.

Gidugang usab niya pagpasabot nga usa ka makatakod nga sakit sa mga baboy ug dili sa tawo. Busa gilantaw niini ang dako nga epekto sa presyo unya sa mga baboy ug supply sa siyudad.

“Tungod kay taas kaayo ang purohan nga mamatay ang mataptan nga baboy, angay gayud nga bantayan nga dili makasulod ang ASF sa atong dakbayan aron mapugngan ang grabeng pagnihit ug pagmahal unya sa karneng baboy,” dugang sa LGU.

Subay niini, giawhag sa Siyudad ang mga konstituwente niini nga estriktong tumanon ang kamandoan aron mapugngan ang pagkuyanap sa ASF ug mapanalipdan ang swine industry sa dakbayan.