DI mominos sa 30 ka local government units sa lalawigan sa Sugbo ang nakahatag na og report kabahin sa kadaut ug epekto nga namugna sa hinay nga El Nino sa ilang dapit.

Sa El Niño Situation Report #2 gikan sa Provincial Disaster Risk Reduction and Management Office (PDRRMO) hangtod sa alas 9 sa buntag sa Abril 12, nasayran nga nikabat na og P44,868,325 ang kantidad sa kadaot sa crops, livestock ug aquaculture sa apektadong mga dapit sa lalawigan.

Kini base sa available nga data nga dunay monetary value atol sa scoping assessment ug tawag nga gihimo sa team nga gilangkoban sa lainlaing mga buhatan sa Kapitolyo sukad Marso 18 hangtod niadtong Biyernes sa buntag, Abril 12.

Kini nga kantidad mosaka pa sanglit dili pa kumpleto ang report kay ang ubang LGU wala pa makahatag og balor sa kadaut nga namugna sa ilang pananom, kahayopan ug panginabuhi sa mga mag-uuma ug mananagat tungod sa tumang kainit sa panahon.

Ang 30 ka mga LGU mao ang Asturias, Alcantara, Argao, Alegria, Aloguinsan, Boljoon, Badian, Balamban, Bantayan, Carcar City, Compostela, Cordova, Consolacion, Dumanjug, Daanbantayan, Danao City, Dalaguete, Ginatilan, Liloan, Mandaue City, Medellin, Moalboal, Pilar, San Fernando, San Remigio, Santander, Santa Fe, Talisay City, Tuburan, ug Tudela.

Atol sa Kasayuran forum sa Provincial Information Office niadtong Biyernes, Abril 12, sigon ni Baby Manuel, engineer III sa Provincial Agriculture Office (PAO), ang lungsod sa Bantayan ang nakatala og labing dako nga danyos nga moabot og P24 milyones gumikan sa lapad nga kadaut sa guso farm niini. SCG