ANG Cebu City Government pinaagi sa Legal Office nipadala og suwat ngadto sa presidente sa Universal Hotel and Resorts, Inc. nga ihunong una ang ilang pagguba sa duha ka government building sa Kawit Island.

Kini samtang wala pa makasugod og imbentaryo ug wala pa mohatag og clearance ang Commission on Audit (COA) subay sa Circular No. 89-296 diin gilatid ang mga proceso sa pagguba sa usa ka government property.

Ang UHRI kinsa maoy gika-kontrata sa Cebu City Government niadtong sayong bahin sa tuig 2019 ubos sa administrasyon ni kanhi mayor Tomas Osmeña motukod og P18 bilyones nga development sa 10 ka ektaryang luna sa Kawit.

Si City Legal Officer Rey Gealon ug SRP Manager Jose Daluz III nipadala og pormal nga komunikasyon kagahapon ngadto ni Frederick Go sa UHRI ubos sa direktiba ni Mayor Edgardo Labella.

“It is best under the circumstances to refrain from engaging in further civil works until there is proper appraisal and compliance with other requirements that the Commission on Audit deems necessary to prescribe after the Commission shall have conducted their audit,” tipik sa suwat ni Gealon ug Daluz.

Ang City Legal Office nakigtambayayong na sa COA Regional Office para sa ilang himuon nga imbestigasyon labot aa pagguba sa Sugbo ug Senior Citizen Building nga gihulagway ni Gealon nga wa mosubay sa proseso bisan pa man kon aduna silay gihuptan nga demolition permit.

Sa laing bahin, ang CLO nagpadala og laing letter ngadto ni Marilou Rizarri, OIC sa COA 7, para susihon ug nihangyo nga ipaubos sa ilang imbestigasyon nag pagguba ni Osmeña sa iyang buhatan niadtong Hunyo 28, 2019.

Gibasehan ni Gealon ang COA Circular 89-296 diin dili mabasta-basta og guba ang edipisyo nga gipanag-iya sa gobyerno kon dili mosubay sa hustong proseso.

Sila si Osmeña ug laing kapin sa 40 ka mga tawo gipasakaan na og kasong administrative ug criminal didto sa Office of the Ombudsman Visayas kalabot niini. (PAC)