Kinahanglang boluntaryo ang Christmas parties sulod sa mga tunghaang pampubliko ug pribado, sumala sa Department of Education Central Visayas (DepEd-7).

Si DepEd 7 Director Salustiano Jimenez nitug-an sa SunStar Cebu sa Lunes, Disyembre 5, 2022, nga hatagan og full discretion ang mga tunghaan kon gusto nilang mag-organisar og party.

Apan si Jimenez nipahinumdom nga kadtong mga tunghaan nga mopahigayon og Christmas parties kinahanglang mosunod sa saktong guidelines, ilabina sa health protocols, sama sa proper distancing, paghugas sa kamot, sanitizing, ug uban pa.

Sa sayo pa, gisubli sa DepEd Central Office nga walay involuntary solicitation nga ipahigayon alang sa pag-organisar sa mga school Christmas party human nagpagawas kini og bag-ong order setting guidelines alang sa pagsaulog sa sektor sa pag-obserbar sa Pasko.

Ang DepEd Order 52 naghatag sa mga guideline sa pagsaulog sa Pasko sulod sa DepEd nga gipagawas niadtong Biyernes, Disyembre 2, 2022.

Sa maong kamanduan, gipahayag sa DepEd nga kinahanglang boluntaryo ang tanang Christmas parties, tema, costume, dekorasyon, ug exchange gifts.

Giingon usab niini nga walay tinun-an nga dili maapil sa pagsalmot sa kasaulogan sa Pasko sa usa ka tunghaan bisan kon mapakyas sa paghatag sa iyang boluntaryong kontribusyon o wala makaandam og regalo.

Dugang pa, ang DepEd niingon nga ang mga Christmas party, ilabina sa mga publikong eskwelahan, dili angay nga makabalda sa mga lesson plan para sa mga estudyante.

Giingon usab niini nga ang mga probisyon alang sa mga serbisyo sa departamento dili kinahanglan gamiton alang sa bisan unsang kalihokan sa holiday.

Ang division offices sa eskuwelahan mahimo usab nga maghatag og dugang nga mga giya sumala sa lokal nga mga tradisyon.

Alang sa mga pribadong eskwelahan ug uban pang learning centers, ang ahensya niingon nga mahimo usab nilang sagupon ang ilang kaugalingong mga regulasyon uban sa department order sa DepEd isip giya.

Gipahinumdoman sa ahensya nga ang mga selebrasyon, ilabina sa mga publikong eskuwelahan ug mga buhatan sa DepEd, kinahanglang simple kutob sa mahimo.

“Celebrations in public schools and DepEd central and field offices should be simple yet meaningful, keeping in mind the true spirit of the season and the austerity called for by the difficult economic times,” tipik sa kamandoan. (HIC)