NABUNGKAG ang derby sa kaka human gironda sa kapulisan sa Sitio Sambag, Barangay Dakit, dakbayan sa Bogo niadtong Sabado sa hapon, Septiyembre 26, upat ang nasikop.

Ang nasikop mao sila si Richard Guylan, 32, ulitawo, fruit vendor ug taga Brgy. Lourdes, Bogo; Edmundo Riveral, 46, minyo, lineman sa Cebeco-2, ug taga Brgy. Gairwn, Bogo; Jose Dondon Edisan, 44, minyo, mananagat, ug taga Brgy. Libertad, Bogo; ug Reynald Stewart Lopez, 26, dunay kapuyo, taga Brgy. Libertad ug job order nga empleyado sa General Services Office sa Bogo City.

Si Police Master Sgt. Joel Pino sa Bogo Police Station nga nahinabi sa Superbalita Cebu, nagkanayon nga nakadawat silag tawag gikan sa nagpakabanang residente nga dunay gipahigayong derby sa kaka ug daghang mga sugarol ang saba kaayo nga nagmasyada sa ilang pusta.

Sumala ni Pino, ang mga sugarol nagkatibuwagsa sa pagpanagan sa ilang pag-abot.

Atol sa ronda, nakuha sa kapulisan ang 15 ka klaseklasing kaka, upat ka improvised nga sudlanan, improvised ring, ug pusta nga P2,565.

Karon, Septiyembre 28, kasong kalapasan sa Presidential Decree 1602 ang ilang ipasaka batok sa mga dinakpan. (GPL)