GAWAS sa kamatayon ni Christine Lee Silawan nga iyang gihimakak, si Jonas Bueno nanghunaw usab sa iyang kalambigitan sa pagpatay sa usa ka mag-uuma sa Dakbayan sa Danao niadtong Enero.

Si Trinidad Batucan giingong susasama usab pagkapatay ni Christine Lee Silawan, kinsa giingong gipanitan ang nawong.

Si Jonas usa sa gitumbok nga suspek sa pagpatay kang Batucan uban ang iyang mga igsuon nga silang Juvy ug Junrey.

Sila si Juvy ug Junrey pulos nakalas atol sa follow up operation sa kapulisan samtang si Jonas giingong nakasibat.

Gibutyag ni Bueno dihang nahinabi sa programa ni Super Bobby Nalzaro sa DYSS Super Radyo nga Marso 5 sa miaging tuig pa siya sa Mindanao hinungdan nga imposible siya ang nipatay kang Batucan.

Apan niangkon si Bueno nga aduna siyay napusilan patay niadtong 2017 nga usa ka Joselito Lumen sa lungsod sa Carmen hinungdan nga nalutsan siya og warrant of arrest ug nagtago-tago.

NITAGO

Giingong sa Nasipit, Agusan Del Norte siya unang nitago gikan sa dakbayan sa Danao sa wa pa nibalhin sa Davao.

Gihimakak usab ni Bueno nga sakop siya og usa ka kulto apil ang iyang mga igsuon nga giingong mokaon og mga parte sa tawo.

Gani giingon niyang wa siya makatambong sa lubong sa iyang mga igsuong napatay sa follow up operation gumikan kay nagtago tago na siya sa Mindanao.

Di usab tinuod nga kanhi sila sakop sa New People’s Army (NPA).

Dako ang iyang pagduda aduna gayuy nagdumot kaniya sa ilang dapit sa Danao hinungdan nga nagpakatap nianang mao nga mga taho.

“Mao nay pasangil karon nga angayan pangitaon asa na na ron nagtago-tago sad nangg nga mga tawhana ang mokaon og tawo. Asa na ron maoy angay pamatud-an. Dili man ko kulto, dili ko mokaon og tawo. Dili ko ungo,” matod ni Bueno.

Samtang gibutyag ni Bueno nga napriso na siya kaniadto sa Cebu Provincial Detention and Rehabilitation Center (CPDRC) sa kasong pagpangawat niadtong 2011, apan nakagawas sa bilanggoan sa 2016.

Usa lang siya ka mag-uuma kaniadto sa dakbayan sa Danao samtang pag-abot sa Mindanao nanguling ug nitrabaho ug construction sa wa pa madakpi sa kapulisan sa Davao sa kasong iyang giatubang niadtong Biyernes.

Mipadayag hinuon si Bueno sa kaandam pag-atubang sa kasong iyang giatubang sa pagkakaron sa higayon nga madala na siya og balik dinhi sa Sugbo.

Si Bueno nahimong person of interest sa kaso ni Silawan human siya gilambigit sa kamatayon ni Batucan niadtong Enero 11.

Ang pagpatay kanila ni Batucan ug Silawan susama kay pulos sila gilaplapan sa nawong.

Tungod sa mao nga mga krimen, ang mga lumolupyo sa mga bukirang barangay sa Dakbayan sa Danao nangahadlok tungod kay giingong kulto ang naghimo niini.

Apan ang kapulisan niingon nga ila pang sutaon kon unsa ka tinuod nga dunay kulto, kinsang mga miyembro giingong mokaon og tawo nga gipangulohan sa mga Bueno.