ANG Department of the Interior and Local Government (DILG)- Cebu City niporma og validation team nga maoy mosusi sa kalambuan sa road clearing operation sa 80 ka mga barangay sa dakbayan.

Ang grupo gipangulohan ni Atty. Ian Kenneth Lucero sa DILG, Police Colonel Englebert Soriano sa Cebu City Police Office (CCPO), Police Major Josephus Alburo sa Cebu City Fire Station, Alma Casimero sa Cebu City Transportation Office (CCTO) ug Raquel Bohol Arce sa Cebu City Prevention, Restoration, Order, Beautification, and Enhancement (PROBE) team.

Base sa memorandum circular sa DILG Central Office, ang mga barangay gihatagan kutob Abril 30 karong tuiga sa paglimpyo sa ilang mga karsada sa mga obstruction apasumpay sa direktiba ni Presidente Rodrigo Duterte.

Si Arce, kinsa maoy frontliner sa clearing operation sa dakbayan, nagkanayon nga andam ang iyang opisina nga moabag sa mga barangay kinsa nanginahanglan sa ilang ayuda.

Dugang sa pangulo sa Probe nga nakadawat na sila og mga request gikan sa mga barangay, hilabi na sa urban areas, diin problema ang ilang mga sidewalk sa encroachment.

Gipadayag ni Arce nga human sa Abril 30, ang validation team maoy mosubay sa mga barangay kansang inspeksyon di nila ipahibawo ug sila usab ang mohatag og grado.

Ang pangulo sa Probe masaligon nga mohimo sa ilang trabaho ang mga barangay official sanglit kon sila mapakyas ug hagbong ang ilang grado, mahimo silang mapasakaan og kaso nga delikado nga moresulta sa ilang pagkasuspenso. (PAC)