Diriyot mamatay ang usa ka mananagat human niya langya ang dagat aron pagkuha sa iyang bugsay nga nahulog.

Apan nikusog ang bawod ug sulog sa dagat hinungdan nga napadpad na hinuon siya palayo sa iyang bangka mga alas 4 sa Miyerkules sa kaadlawon, Hunyo 16, 2021 sa kadagatan sa lungsod sa Argao.

Human sa usa ka oras ug tunga, naluwas si Werly Mamac, taga Barangay Canbanua, Argao, sa duha ka mga tawo nga namasol sa payaw duol sa iyang napadparan.

Naluwas si Mamac human kini makit-i sa namasol sa kadagatan sa lungsod sa Argao sa Miyerkules, Hunyo 16, 2021.

Ang nakaluwas kaniya mao sila si Leo Anthony Goyo ug Walter Calledo.

Sila si Goyo ug Calledo nanagat mga alas 4:45 sa kaadlawon ug sa ilang pag-abot sa dapit diin dunay payaw, ilang nadunggan nga adunay nag tawag og “tabang” duol sa ilang nahimutangan.

Ang duha nakadesidir nga ilang pangitaon ang tawo nga nangayo og tabang.

Pipila ka minutos ang nakalabay, nakakita sila og pumpboat nga way tawo.

Busa, nisamot ang ilang pagtuo nga ang sakay niini maoy nangayog pakitabang.

Pipila ka minutos ang nakalabay, ilang nakaplagan si Mamac nga naglutaw-lutaw sa dagat mga 150-metros ang gilay-on gikan nila ug sa pumpboat niini.

Luya na kaayo si Mamac, kinsa dali nilang gitabang ug gipasakay sa ilang sakayan nga Reel ug Rod.

Pipila ka minutos ang milabay niabot ang Bantay Dagat ug gidala sa mamala si Mamac diin nag paabot na ang rescue team sa lungsod.

Matod ni Goyo nga dako kaayo iyang kalipay nga nakaluwas sila og tawo nga sama nila nga mananagat.

“Dakong kalipay namo nga nakaluwas mi og kinabuhi, Sir. Wala mi magduha-duha og tabang pagkadungog namo sa iyang pag syagit..kay gibutang ra sad namo among kaugalingon sa iyang sitwasyon,” sulti ni Goyo sa Superbalita Cebu.

Dugang niya nga diriyot na malumos si Mamac kay usa ka oras ug tunga nang naglutaw-lutaw sa kadagatan, luya na kaayo kini.

“Hapit najud to siya mamatay ato. Maayo gani na anghelan siya ato nga na timing nga nakapangisda mi atong higayuna,” dugang ni Goyo.

Gidapatan siya og first aid sa Argao Municipal Disaster Risk Reduction Management rescue personnel ug dayon gipapauli ra sa ilang balay.