AGI’G pagdisiplina sa mga namaligya ug ilabi na sa mga nanag-iya og stall sa Larsian food strip, ang tagdumala sa pasilidad nanawagan sa Bureau of Internal Revenue (BIR) nga susihon kon nitamod sila sa mga lagda sa maong ahensiya.

Kini sama na lang kung narehistro ang negosyo diha sa BIR ug dunay official receipt (OR) nga ma-isyu sa mga kustomer nga mangayo niini.

Matod ni Larsian administrator Joey Herrera, importante nga magtinir og OR ang mga stall owners sa sikat nga food strip aron sanglit duna gyuy mga kustomer nga mangita niini ug labaw sa tanan, gimando kini sa balaod.

Ang Kapitolyo magbutang og staff sa Larsian gikan alas 7:00 sa buntag hangtud alas 10 sa hapon ug moatiman sa posibleng reklamo gikan sa mga kustomer labot sa mapahimuslanon nga vendors.

Bukas sud sa 24 oras ang Larsian aron pag-atiman niadtong mga gustong mokaon sa bisan unsang oras. (AZLG)